照顧早產嬰的媽媽，需要比其他媽媽付出更多心力和時間，單是學習食奶，早產嬰就要比其他足月嬰兒用上更多時間。
Sandy的女兒雯雯 35週出世，是早產嬰，Sandy在醫護人員鼓勵下，決定餵人奶。「人奶係早產BB最有營養嘅食物，因為人奶裏面嘅營養成份最能滿足早產BB嘅發展需要，而且人奶令早產BB容易吸收，又可以提高佢哋嘅免疫力，所以我決定餵人奶。」
但是，雯雯出世後一直在加護病房留醫， 不能埋身食奶，Sandy唯有在家努力泵奶，每三小時泵一次，半夜也較鬧鐘起身泵奶，泵好的奶就儲起來放在雪櫃冷藏，每天到醫院兩次送奶。縱然辛苦，但為了雯雯的健康著想，Sandy咬緊牙關堅持下去。
不過，雯雯剛開始食奶的時候，由於仍未懂得吞咽，需要用胃喉餵奶，「有時見她用力將條胃喉扯出嚟，好似好唔舒服咁，睇見就覺得好心痛。」用胃喉灌奶的日子過了兩星期左右，姑娘叫Sandy嘗試用杯餵奶，但雯雯用杯食奶時很易嗆奶，於是姑娘建議改用奶樽餵奶，「我都掙扎咗好耐好唔好用奶樽餵奶，因為會令佢有『乳頭混淆』，佢習慣咗用奶樽食奶後就會抗拒埋身。但我好擔心佢會嗆奶，所以最後都係決定用奶樽。」
Sandy憶述雯雯剛開始用奶樽食奶時，她像是沒有足夠力氣去吸啜，食5ml的奶也要花上很多時間，不過慢慢她就進步了，姑娘也讚她「啜得好叻」。另一個餵奶難題是早產的雯雯腸道較弱，很容易嘔奶，掃風的時候經常嘔大量的奶，有好幾次姑娘更擔心她嘔奶是有其他原因導致，安排她照X光，以確定她的腸和胃沒有問題。「當時我仲覺得醫院小題大做，BB嘔奶好平常，唔使次次都照X光吧。但後來睇新聞見到有個患腸扭結嘅BB嘔奶後，因為冇即時發現腸有問題，錯過咗救治機會，果時先知原來BB無故嘔奶唔可以忽視，醫院嘅細心檢查都係為咗BB好。」
雯雯現已一歲，在Sandy努力餵哺人奶下，磅數已追上同齡嬰兒。
